3911 Sisimiut

Umiarsualivimmut 2, 1. sal

 

+299 86 35 00

Sisimiut Kangerlussuullu akornanni aqqusineq – inuussutissarsiornikkut nukittorsaassaaq.

Anguniagaraarput Destination Arctic Circle-p maannamiit amerlanerujussuarnik takornarissanik tikinneqartalernissaa, tamannalu angussagutsigu nittarsaassineq annertunerusoq kiisalu angallannikkut periarfissat annertunerusut pisariaqarput.

Taamaattumik Qeqqani Inuussutissarsiornermi Siunnersuisooqatigiit, suliffeqarfinnit 80-init ilaasortaaffigineqartup manna borgmesterip Naalakkersuisunut piumasaqaateqarnera taperserniarpaa. Naalakkersuisut soqutiginninneq piviusoq takutittariaqalerpaat, aqqusinermi maanna piviusunngortariaqarmat. Taamaaliorunillu Naalakkersuisut namminneq anguniagarisartik, tassalu nuna tamakkerlugu ineriartortitsineq piviusunngortissavaat, tamannalu Qeqqata Kommunia tamaat isigalugu aningaasaqarnermut iluaqutaassaaq.

 

 Aasivissuit – Nipisat UNESCO-p nunarsuarmioqatigiinnut kingornussassanngortitaannut ilanngun-neqassasoq naatsorsuutigaarput, tamatumalu kingunerisaanik takornarissat amerliartuinnarnissaat naatsorsuutigaarput. Destination Arctic Circle-mi taamaalilluta piareersimasussaavugut pinngortitamik kul-turikkullu misigisassanik takornarissanut neqerooruteqarluassalluta.

Qimusserneq, nunami imaatigullu angalaarnerit, pisunnerit, aalisariarneq, tammajuitsussarsiorluni piniarneq allarpassuillu neqeroorutigalugit.

Naluneqanngilaq nunatsinni Qeqqata Kommunia annermillu Kangerlussuaq nunatsinni takornariaqarneq eqqarsaatigalugu orninneqarnerpaat tulliatut inissisimasoq. Sulilu takornarissat amerliartorput, taamaattumillu pinngortitaq kusanartoq suli annertunerusumik atorluarsinnaavarput.

 

Aqqusinertaassap Qeqqata Kommunianut iluaqutissaasa ilai ersarissarumavagut:

  • Angallannikkut periarfissat pitsaanerusut aningaasaliinissamut periarfissat annertusassavaat, takornariaqarnikkut misigisassanik nutaanik ineriartortitsinissaq Sisimiuni Kangerlussuarmilu periarfissagissaarnerulissaaq.

  • Nunami annertuumik periarfissalimmi takornarissat Sisimiuniit Kangerlussuarmiillu angallavissaat amerlanerusut pilersinneqassapput, taamatullu takornariaqarnermi suliaqartut amerlissallutik. Aqqusinniornerullu kinguneranik unnuisarfinnik sanaartorneq angallassinermiillu kaaviiaartitsineq annertunerulissaaq.

  • Takornarissanut aqqutit pitsaanerit kingunerissavaat pisuttuartitsinerit amerlanerulernissaat, takornariartaatiniillu takornarissat tikittartut ukiormanna 27.000-iusut suli amerliartornissaat naatsorsuutigaarput.

  • Aqqusineqalernitta kingunerissavaa ukioq kaajallallugu takornarialerisut nunaqavissullu angalasinnaalernerat, nunatarmi siornatigut tikinneqariaannaanngitsoq tikinneqarsinnaalissaaq.

  • Aqqusinniornerup nunami angallanneq isumannaannerusoq kingunerissavaa.

  • Qeqqata Kommuniani niuernikkut sanaartornikkullu annertunerusunik suliassaqalernissaq naatsorsuutigaarput, taamatullu tammajuitsussarsiortunik piniartitsisartut angalasullu allat kaaviiartitaat annertusissapput. Tamakku katikkaanni suliffissat amerlasuut pilersinneqarnissaat naatsorsuutigaarput suliassaqarfiillu ukiup ilaannaani suliassaqarfiusaraluartut ukioq kaajallallugu suliassaqalernissaat naatsorsuutigaarput.

  • Aatsitassarsiornikkut misissueqqaarnerit annikinnerusut eqqarsaatigalugit nunataq tikinneqarsinnaalertussaq periarfissanik ammaassissasoq aamma naatsorsuutigaarput, angallannikkummi aningaasartuutit misissueqqaarnerni annertuut annikillisinneqarsinnaammata.

Aqqusinissaq inuussutissarsiortut kisimik iluaqutiginavianngilaat, kisiannili innuttaasut tamarmik nunami angallannikkut periarfissagissaarnerulernermikkut pinngortitamik atuinerulernissaat naatsorsuutigaarput.

 

Taamaattumik neriuppugut Inatsisartuni partiit Naalakkersuisullu Qeqqata Kommuniani piujuaannartitsineq aallaavigalugu ineriartortitserusunnerput taperserlugu qanoq iliuuseqaqataarusussasut, uagummi aamma ineriartorneq takornariaqarnermilu annertusaaneq  pisariaqartipparput.

Please reload