Qeqqata Kommuniani takornariaqarnermut Kangerlussuaq pingaaruteqarpoq.

 

Qeqqata Kommuniani inuussutissarsiortut Kangerlussuarmi, Sisimiuni Maniitsumilu takornariaqarnerup ineriartorfissaqarluarnera upperivaat. Taamaattumillu nuannaarutigaarput Inatsisartuni partiit amerlanerussuteqartut Kangerlussuup mittarfissuartut atuunnissaa, talittarfiup nutaap sananeqarnissaa kiisalu aqqusinniornissaq katersuuffigimmassuk. Tamannalu nunaqavissunut, inuussutissarsiortut takornariaqarnermullu iluaqutaalluassaaq. Kangerlussuarmi takornarialerisut inuussutissarsiortullu ineriartorput taamatullu namminneq unnuisarfinnik sanaartornissamut iluarsartuussinissamullu piareersimallutillu pileripput. Taamatuttaaq misigisassanik nutaanik ineriartortsineq ingerlaavarpoq takornariaqarnikkut iluaqutaalluartussaq.

Kingullertigut paasivarput illuaqqiornissanut unnuisarfiliornissanullu 100 mio.-ninik arlalinnik aningaasaleerusuttoqartoq.

Arctic Circle Business piuvoq Qeqqata Kommuniani inuussutissarsiornikkut ineriartortitsineq suliffissanillu pilersitsinissaq anguniarlugit. Taamaattumik Qeqqata Kommuniani angallannikkut pissutsit kiisalu aqqusinniornissaq eqqartorneqartillugit inuussutissarsiortut peqataatinneqarnissartik kissaatigaat. Sisimiut Kangerlussuullu akornanni aqqusinissap pilersinnissaa pillugu Qeqqata Kommuunia suleqatigineqassasoq aamma Sisimiut Kangerlussuullu akornanni angallannikkut tunngaviusumik aaqqissugaanerup pitsaanerpaamik aaqqiissuteqarfiginissaa pillugu suleqatigiittoqassasoq partiit suleqatigiilersut neriorsuutigaat. Kangerlussuup mittarfissuartut takissusaa allanngortinneqarani piusariaqarpoq, tassami takornariartaatinut Kangerlussuaq aallaavittut pitsassuuvoq, soorlu Albatros Expeditions-imiit Gorm Petersen oqartoq:

”Kangerlussuaq uatsinnut aallartiffissatut pingaarnertut siullertullu pissusissamisoortumik inissisimajuarsimavoq. Silap unerisimasuunera kiisalu timmisartunik tulluartumik angissusilinnik (soorlu Norsaq, Air Greenland) miffigineqarsinnaanera pissutaapput, tassami takornariartaatit ilaasui ikisussat niusussallu Kangerlussuakkoortittarpagut, tamatumanilu aamma nassiussugassat eqqarsaatigalugit Kangerlussuaq piukkunnartuuvoq. Tamatuma saniatigut illoqarfinnut takornariarfissanut soorlu Sisimiunut Qeqertarsuullu tunuanut angalatitsivinniit angalasuniillu  nuannarineqaqisumut takornariarnissamut periarfissagissaartitsivoq, taamaalilluni ullut tamaasa illoqarfiit nunaqarfiillu ullut tamaasa nutaat tikinneqarsinnaallutik. Ukiuni aggersuni Kangiamiut issittumut takornariarnerulernissaat naatsorsuutigaarput, soorlu Sikuiutsoq Kujallermut angalaartitsinerit soqutigineqarnerulersimasut, Kangerlussuarmi annertusaanerit illuaqqanik arlariinnik misigisassanillu nutaanik pilersitsinissat pilersaarutigaagut, taamaalilluta ”post-trip”-inik angalanerup naanerani Kangerlussuarmi misigisassanik tuniniaasarnissarput pilersaarutigaarput.”

Angallannikkut atugassarititaasut ilusilersorneqarneranni inuussutissarsiortut naatsorsuutigaat peqataatinneqarnertik annertunerussasoq, taamatuttaarlu paaserusupparput ameerikkarmiut inissisimanerat qanoq ittuussanersoq kiisalu uagut suliassat suut suleqataaffigissanerigut paaserusupparput. Taamatuttaaq ameerikkarmiut Kangerlussuarmi mittarfiup aningaasalersorneqarnissaanut peqataaniarnersut aqqusinniornissamilu aningaasaleeqataaniarnersut paaserusupparput.

Aasivissuit – Nipisat UNESCO-p nunarsuarmioqatigiinnut piniarnikkut oqaluttuarisaaneq kulturilu ukiuni 4.500-ni ingerlasimasoq aallaavigalugu kingornussassanngortinneqareermat naatsorsuutigaarput takornarissat amerliartuinnarnissaat. Destination Arctic Circle-mi taamaalilluta piareersimasussaavugut pinngortitamik kulturikkullu misigisassanik takornarissanut neqerooruteqarluassalluta. Qimusserneq, nunami imaatigullu angalaarnerit, qamuteralatsitsinerit, cykelertitsinerit, pisunnerit, aalisariarneq, tammajuitsussarsiorluni piniarneq minnerunngitsumillu Sermersuarmut angallassinerit neqeroorutigalugit.

Takornariartaatinik takornarissat UNESCO-mut attuumassutilinnik misigisassaat amerlissapput, ass. Nipisat-nut takornariarneq itsarnitsanik nassaarfiulluarsimasoq takuniaaffiusinnaasoq kiisalu nunaqarfik UNESCO-p eriagisassatut toqqarsimasaanut ilaasoq Sarfannguit. Qeqqata Kommuniani misigisassat assigiinngissitaarneri takornariartaatinut ilaallutik takornariartut kulturikkut misigisaannut pitsaanerulersitsissaaq.

Kangerlussuup Sisimiullu akornanni aqqusinniornissaq, aatsaat taamak pissusissamisoortigaaq. Nunarujussuaq takornariaqarnikkut atugassatut ammaanneqassaaq, soorlu Island-imi Golden Circle taamatut suliarineqarsimasoq. Taamatulli ineriartortitsisoqassappat atugassarititaasut eqqortut piusariaqarput taamatulli Inatsisartunit Naalakkersuisuniillu tapersersuineq piusariaqarpoq, inuussutissarsiortummi piareersimapput.

 

 

 

Asseq: Visit Greenland

 

Please reload

3911 Sisimiut

Umiarsualivimmut 2, 1. sal

 

+299 86 35 00